chehre makān raah ke patthar badal ga.e

jhapkī jo aañkh shahr ke manzar badal ga.e

shahroñ meñ hañstī kheltī chaltī rahī magar

jañgal meñ bād-e-sub.h ke tevar badal ga.e

haañ is meñ kāmdev kī koī ḳhatā nahīñ

raste vafā ke saḳht the dilbar badal ga.e

vo āñdhiyāñ chalī haiñ sar-e-dasht aarzū

dil bujh gayā vafāoñ ke mehvar badal ga.e

phūTī kiran to jaag uThī zindagī 'fuzail'

sunsān rāstoñ ke muqaddar badal ga.e