ḳhuun palkoñ pe sar-e-shām jamegā kaise
dard kā shahr jo ujḌā to basegā kaise
roz-o-shab yādoñ ke aaseb satā.eñge koī
shahr meñ tujh se ḳhafā ho ke rahegā kaise
dil jalā lete the ham log añdheroñ meñ magar
dil bhī un tez havāoñ meñ jalegā kaise
kis musībat se yahāñ tak tire saath aa.e the
rāsta tujh se alag ho ke kaTegā kaise
āḳhir us ko bhī hai kuchh 'ja.afarī' duniyā kā ḳhayāl
der tak raat ga.e saath rahegā kaise