diloñ ke aa.ine dhuñdle paḌe haiñ

bahut kam log ḳhud ko jānte haiñ

ḳhizāñ ke ḳhushk pattoñ ko na chheḌo

thake-māñde musāfir so rahe haiñ

hamārī ġham-gusārī meñ shab-e-ġham

charāġh āhista āhista jale haiñ

nishāñ paatā nahīñ koī kisī kā

sabhī ik dūsre ko DhūñDte haiñ

bas ik mauj-e-havā-e-ġham hai kaafī

irāde kyā gharauñde ret ke haiñ

ḳhudā dil kā nagar ābād rakhe

hazāroñ tarah ke ġham pal rahe haiñ

shab-e-mahtāb yādeñ gul-ruḳhoñ kī

safīne mauj-e-ḳhūñ meñ tairte haiñ