qahr kaisā sub.h-dam bād-e-bahārī kar ga.ī
phuul barsānā the dil par sho.ala-bārī kar ga.ī
tishna-e-takmīl ik muddat se thā zauq-e-junūñ
kaam kuchh to dostoñ kī sañg-bārī kar ga.ī
jis qadar jhukte ga.e hote ga.e ham sar-buland
rif.atoñ se āshnā ye ḳhāksārī kar ga.ī
ham gunahgāroñ ko rahmat kī kahāñ ummīd thī
mustahiq lekin hamārī sharmsārī kar ga.ī
har varaq dīvān-e-dil kā naqsh-e-mānī hai 'bahār'
nok-e-mizhgāñ dekhiye kyā husn-kārī kar ga.ī