mirī taraf se nigāheñ to vo haTā legā
vo apne zehn se kaise mujhe nikālegā
laboñ pe phuul mohabbat ke jo sajā legā
use harīf bhī baḌh kar gale lagā legā
gunahgār na ban us ko bad-duā de kar
ġhurūr us kā use ḳhud hī maar Dālegā
har ek aag ko vo raushnī samajhtā hai
maiñ chuuk jā.ūñ to vo uñgliyāñ jalā legā
bahut sambhāl ke rakkhā hai āñsūo tum ko
mirī tarah tumheñ āñkhoñ meñ kaun pālegā
agar junūn kī had se guzar gayā dariyā
to apne saath vo 'sāhil' ko bhī bahā legā