ab kahīñ sāya-e-gesū bhī nahīñ

chain dil ko kisī pahlū bhī nahīñ

jaane kyā soch ke ḳhush baiThā huuñ

mausam-e-gul bhī nahīñ tū bhī nahīñ

ab tirī nazr karūñ kyā ai dost

ab mirī āñkhoñ meñ aañsū bhī nahīñ

kis ko siine se lagā kar ro.eñ

dasht meñ ab koī aahū bhī nahīñ

muskurā uThtī thī vo aañkh kabhī

aur ab jumbish-e-abrū bhī nahīñ

dil ko hasrat hai tire milne kī

aur hālāt pe qaabū bhī nahīñ