jo zimmedāriyāñ qismat ne mere sar rakh diiñ
to phir nazākateñ maiñ ne uThā ke ghar rakh diiñ
tumhāre baad zamāne meñ aur kyā dekheñ
lo ham ne chehre se āñkheñ utaar kar rakh diiñ
phir aaj umr-e-guzishta kī yaad aa.ī hai
phir apne maazī kī tasvīreñ dekh kar rakh diiñ
yaqīn hogā hameñ ab tumhāre hone kā
lo ham ne uñgliyāñ jalte charāġh par rakh diiñ
chhupā.e baiThī huuñ siine meñ ek muddat se
vo bāteñ dil kī tire sāmne agar rakh diiñ