hai dhuup tez koī sā.ebān kaise ho

ye vaqt ham pe bhalā mehrbān kaise ho

na lafz ho to koī dāstān kaise ho

zabān kaaT lī tum ne bayān kaise ho

hamāre hisse meñ do-gaz zamīn bhī to nahīñ

hamāre haq meñ koī āsmān kaise ho

aḌe raheñge agar apnī zid pe donoñ farīq

to koī faisla bhī darmiyān kaise ho

gañvā na baiThūñ kahīñ tujh ko āzmāne meñ

maiñ Dar rahī huuñ tirā imtihān kaise ho

jo baat jhuuT hai sach kaise maan luuñ us ko

batāo duur ye vahm-o-gumān kaise ho