fasīl-e-dard ko mismār karne vaalī huuñ
maiñ āñsuoñ kī nadī paar karne vaalī huuñ
mujhe ḳhudā kī razā se hai vāsta har dam
maiñ ḳhud-numā.ī se inkār karne vaalī huuñ
ye us kī marzī ki iqrār vo kare na kare
maiñ aaj ḳhvāhish-e-iz.hār karne vaalī huuñ
vo jis ne kī hai hamesha muḳhālifat merī
usī ko apnā madad-gār karne vaalī huuñ
vafā kī raah meñ ḳhud ko tabāh kar ke maiñ
tamām shahr ko bedār karne vaalī huuñ
koī na Daale nigāh-e-ġhalat ki maiñ apne
nihatte hāthoñ ko talvār karne vaalī huuñ