un ke jab jab bhī mire naam lifāfe aa.e
saath meñ logoñ ke kyā kyā na qayāfe aa.e
vo sahīfa hai mirā dil ki tirī nisbat se
jis pe har daur meñ zaḳhmoñ ke izāfe aa.e
mere ehsās ne ḳhushbū ko bulāyā jab bhī
terī zulfoñ ke mahakte hue naame aa.e
tajarbe umr ke har moḌ pe muñh moḌ ga.e
kaam kuchh aa.e to bachpan ke qayāfe aa.e
aap hī aa.e na aane kī ḳhabar pahuñchā.ī
vaise aane ko bahar rañg lifāfe aa.e