ham zarre haiñ ḳhāk-e-rahguzar ke
dekho hameñ baam se utar ke
chup ho ga.e yuuñ asiir jaise
jhagḌe the tamām bāl-o-par ke
va.ada na dilāo yaad un kā
nādim huuñ ḳhud e'tibār kar ke
ai bād-e-sahar na chheḌ ham ko
ham jaage hue haiñ rāt-bhar ke
shabnam kī tarah hayāt ke ḳhvāb
kuchh aur nikhar ga.e bikhar ke
jab un ko ḳhayāl-e-vaz.a aayā
andāz badal ga.e nazar ke
yuuñ maut ke muntazir haiñ 'bāqī'
mil jā.egā chain jaise mar ke