ho gayā pā.emāl āñkhoñ meñ
mar gayā ik savāl āñkhoñ meñ
us kī do be-misāl āñkhoñ
husn thā bā-kamāl āñkhoñ meñ
kyā bachā pur-malāl āñkhoñ meñ
hai faqat ḳhuun laal āñkhoñ meñ
ishq-e-avval hai zehn meñ jānāñ
jo huā tere naal āñkhoñ meñ
jin se niklī ho āñsuoñ kī nadī
tum ne dekhā vo taal āñkhoñ meñ
jañg jaarī hai chaar āñkhoñ meñ
ho rahā hai qitāl āñkhoñ meñ
un kī āñkhoñ se jab milī āñkheñ
dil kā kah Daalā haal āñkhoñ meñ
zindagī be-vafā hai ai 'ārif'
itne sapne na paal āñkhoñ meñ