derīna ḳhvāhishoñ se sajāyā gayā mujhe
maqtal meñ kis fareb se laayā gayā mujhe
bār-e-samar se shāḳh-e-shajar jhuk ga.ī to kyā
maiñ be-samar thā phir bhī jhukāyā gayā mujhe
sayyāra-e-zamīñ hai kahāñ sochtā huuñ maiñ
pātāl meñ falak se girāyā gayā mujhe
maiñ naqsh-e-hijr-e-yār huuñ shab kī fasīl par
jaltā huā charāġh banāyā gayā mujhe
laa.e haiñ reza reza kisī aa.ine ke paas
merā hī jism jaise dikhāyā gayā mujhe
patthar meñ jab gulāb mahakte dikhā diye
ye mo.ajiza nahīñ hai batāyā gayā mujhe
chashmoñ ke paas ho ke bhī pyāsā huuñ maiñ 'zafar'
reg-e-ravāñ kā raqs dikhāyā gayā mujhe