jab tak junūñ junūñ hai ġham-e-āgahī bhī hai

yaanī asīr-e-naġhma mirī be-ḳhudī bhī hai

khilte haiñ phuul jin ke tabassum ke vāste

shabnam meñ un ke aks kī āzurdagī bhī hai

kuchh sā.atoñ kā rañg mire saath saath hai

vo nik.hat-e-bahār magar ajnabī bhī hai

zinda huuñ maiñ ki aag jahannam kī ban sakūñ

firdaus-e-ārzū mire dil kī kalī bhī hai

is yaad kā bhañvar mere ehsās meñ rahā

iz.hār-e-mauj mauj kī nā-guftanī bhī hai

palkoñ pe chāñdnī ke takallum kī aañch thī

hoñToñ pe guftugū ke liye tishnagī bhī hai

kyuuñ tīrgī se is qadar mānūs huuñ 'zafar'

ik sham-e-rah-guzār ki sahar tak jalī bhī hai