mohabbatoñ ke na.e dā.eroñ meñ rahtā huuñ
ḳhatoñ ke matn se ab hāshiyoñ meñ rahtā huuñ
tamām jism hī āñkheñ kiye hai vo apnā
maiñ ek vaqt ka.ī ā.inoñ meñ rahtā huuñ
maiñ jaan jaan nichhāvar huuñ apnī miTTī par
vo sochte haiñ ki maiñ sāzishoñ meñ rahtā huuñ
qadam qadam pe balā.eñ haiñ mere hisse meñ
maiñ ḳhush-nasīb sadā sānehoñ meñ rahtā huuñ
maiñ ḳhaak ḳhaak uḌātā huuñ apnī miTTī kā
kahīñ maiñ ab bhī tirī bandishoñ meñ rahtā huuñ