naqd-e-jāñ kī mire sauġhāt abhī baaqī hai

shab-e-hijrāñ kī mudārāt abhī baaqī hai

dhuup meñ tark-e-marāsim kī jhulasne vaale

āḳhirī shām-e-mulāqāt abhī baaqī hai

ḳhāliq-e-kaun-o-makāñ ham se nahīñ hai nārāz

gardish-e-arz-o-samāvāt abhī baaqī hai

vaqt kī dhuup meñ kho.e mire nashshe kitne

ik tirī chashm-e-ḳharābāt abhī baaqī hai

roz-e-avval se ajal khel rahī hai shatranj

mujh ko shah ho bhī chukī maat abhī baaqī hai

chāñdnī par hai tumheñ rañg-e-sahar kā dhokā

gul na kar denā diye raat abhī baaqī hai

har ġhazal kī mujhe takmīl pe mahsūs huā

dil meñ kahne ko koī baat abhī baaqī hai