aañkh se ḳhvāb kā rishta nahīñ rahne detī
yaad us kī mujhe tanhā nahīñ rahne detī
lazzat-e-dar-badarī meñ baḌī vus.at hai ki ye
dar-o-dīvār kā jhagḌā nahīñ rahne detī
ghar ho yā raunaq-e-bāzār kahīñ bhī jā.ūñ
be-qarārī to kisī jā nahīñ rahne detī
band kar luuñ to ajab naqsh nazar aate haiñ
aañkh mahrūm-e-tamāshā nahīñ rahne detī
ḳhvāhish-e-zar kī havā dil ke siyah-ḳhāne meñ
ik diyā hai jise jaltā nahīñ rahne detī