tajalliyoñ se añdheroñ kī jañg jaarī hai
ujāle surḳh-rū hoñ ye duā hamārī hai
jahāñ pe kal thā gulistāñ vo aaj maqtal hai
falak ḳhamosh hai phir dekheñ kis kī baarī hai
sar-e-niyāz jhukānā mohabbateñ denā
ye buz-dilī nahīñ dar-asl ḳhāksārī hai
rah-e-jumūd se nafrat uḌaan kī ḳhvāhish
haqīqatan ye zarūrat hai jāñ-nisārī hai
ye gulistāñ hai hamārī riyāzatoñ kā samar
ise sañvārne meñ sab kī hisse-dārī hai