duur baiThe haiñ kyuuñ paas to aa.iye
vaqt ruktā nahīñ yuuñ na sharmā.iye
zīna-e-ishq bhī zīnat-e-bait bhī
dil meñ rakhiye qadam dil meñ bas jā.iye
chaar sū hai ghaTā hai qayāmat bapā
zulf bahr-e-karam yuuñ na bikhrā.iye
chāñd to hai hasīñ aap sā to nahīñ
baat sach hai yahī maan bhī jā.iye
maiñ huuñ bismil-nazar aap ko hai ḳhabar
mar na jā.ūñ kahīñ ab na taḌpā.iye
aap hī kā to naqsh-e-qadam chāñd hai
chāñdnī ban ke āñgan meñ chhā jā.iye