mire gumān kī had se nikalne vaalā thā

vo mujh se pahle hī rasta badalne vaalā thā

tujhe hī jaane kī ujlat thī ai musāfir-e-man

vagarna maiñ bhī tire saath chalne vaalā thā

jahāñ pe qāfila-e-sālār thak ke baiTh gayā

vahīñ se ik nayā rasta nikalne vaalā thā

nahīñ thī mujh ko zarūrat kisī sahāre kī

ki maiñ to aap hī gir kar sambhalne vaalā thā

maiñ lauT aayā samundar se Dar ke jab 'faizān'

usī ghaḌī vo ḳhazāna ugalne vaalā thā