dair-o-haram bhī aa.e ka.ī is safar ke biich

merī jabīn-e-shauq tire sañg-e-dar ke biich

kuchh lazzat-e-gunāh bhī hai kuchh ḳhudā kā ḳhauf

insān jī rahā hai isī ḳhair-o-shar ke biich

ye ḳhvāhish-e-visāl hai yā hijr kā sulūk

chuTkī sī lī hai dard ne aa kar jigar ke biich

bichhḌe to ye malāl kī sauġhāt bhī milī

tākīd thī ḳhayāl na aa.e safar ke biich

ḳhushbū kī tarah lafz the ma.anī ba-qaid-e-rañg

ye marhale bhī aa.e haiñ arz-e-hunar ke biich

dulhan banī thī 'āshā' vo shab yaad hai mujhe

gum the mire havās hujūm-e-nazar ke biich