miTTī thī ḳhafā mauj uThā le ga.ī ham ko

girdāb meñ sāhil kī balā le ga.ī ham ko

ham kab se lapakte hue sholoñ meñ khaḌe haiñ

is aag meñ ik gul kī havā le ga.ī ham ko

ik sarv kī ḳhush-qāmatī āñkhoñ meñ basī thī

jo zillat-e-duniyā se bachā le ga.ī ham ko

saa.e ke ta.āqub meñ gañvā.ī hai magar umr

har samt vahī ek sadā le ga.ī ham ko

tū jān-e-mohabbat hai magar terī taraf bhī

ik ḳhvāhish-e-tash.hīr-e-vafā le ga.ī ham ko