vo ḳhush-ḳhirām ki burj-e-zavāl meñ na milā
mujhe sukūn sitāre kī chaal meñ na milā
majāl de ke mujhe ḳhāmushī vabāl huī
mirā javāb vidā-e-savāl meñ na milā
vo nā-shanās rahā fāḳhera libāsoñ meñ
agar milā to mohabbat kī shaal meñ na milā
nazar mile to use dekh be yaqīnī se
jise qayām shab-e-ehtimāl meñ na milā
vo be-hijāb mirī yaad se hijāb kare
ajiib kyā hai ki ab tak ḳhayāl meñ na milā
mirā mizāj kisī ke mizāj se na mile
mirā kamāl kisī ke kamāl meñ na milā
safar meñ rakh mujhe merī judā.iyoñ se parakh
firāq de abhī ḳhāk-e-visāl meñ na milā