maut ne parda karte karte parda chhoḌ diyā
mere andar aaj kisī ne jiinā chhoḌ diyā
ḳhauf ki rasta bhuul ga.ī ummīd kī ujlī dhuup
us laḌkī ne bālkanī par aanā chhoḌ diyā
roz shikāyat le kar terī yaad aa jaatī hai
jis kā dāman āhista āhista chhoḌ diyā
duniyā kī be-rāh-ravī ke afsāne likhe
aur apnī duniyā-dārī kā qissa chhoḌ diyā
bas titlī kā kachchā kachchā rañg āñkhoñ meñ hai
zinda rahne kī ḳhvāhish ne pīchhā chhoḌ diyā