mujhe ḳhabar thī mirā intizār ghar meñ rahā

ye hādisa thā ki maiñ umr bhar safar meñ rahā

maiñ raqs kartā rahā saarī umr vahshat meñ

hazār halqa-e-zanjīr bām-o-dar meñ rahā

tire firāq kī qīmat hamāre paas na thī

tire visāl kā saudā hamāre sar meñ rahā

ye aag saath na hotī to raakh ho jaate

ajiib rañg tire naam se hunar meñ rahā

ab ek vādī-e-nisyāñ meñ chhuptā jaatā hai

vo ek saaya ki yādoñ kī rahguzar meñ rahā