badan churāte hue ruuh meñ samāyā kar

maiñ apnī dhuup meñ soyā huā huuñ saayā kar

ye aur baat ki dil meñ ghanā añdherā hai

magar zabān se to chāñdnī luTāyā kar

chhupā huā hai tirī ājizī ke tarkash meñ

anā ke tiir isī zahr meñ bujhāyā kar

koī sabīl ki pyāse panāh māñgte haiñ

safar kī raah meñ parchhā.iyāñ bichhāyā kar

ḳhudā ke vāste mauqa.a na de shikāyat kā

ki dostī kī tarah dushmanī nibhāyā kar

ajab huā ki girah paḌ ga.ī mohabbat meñ

jo ho sake to judā.ī meñ raas aayā kar

na.e charāġh jalā yaad ke ḳharābe meñ

vatan meñ raat sahī raushnī manāyā kar