jin ko tauqīr-e-rah-o-rasm-e-vafā yaad nahīñ
kyā gila un se kareñ jin ko ḳhudā yaad nahīñ
jaane aa.e bhī the ḳhushbū ke sandese mujh ko
jaane guzrī thī dabe paañv sabā yaad nahīñ
aap ne saath nibhāne kā kiyā thā va.ada
is pe kahte haiñ vo ham se ba-ḳhudā yaad nahīñ
na rahā sham-e-farozāñ meñ bhī vo sho.ala-e-ishq
aur parvānoñ ko marne kī adā yaad nahīñ
ek ummīd-e-masīhā.ī bhī āḳhir kab tak
phir na kahnā hameñ ādāb-e-vafā yaad nahīñ
sho.ala-e-gul se fanā ho ga.ī shabnam 'anjum'
merī hastī huī kyuuñ ḳhaak zarā yaad nahīñ