zinda rahne ke tazkire haiñ bahut
marne vāloñ meñ jī uThe haiñ bahut
un kī āñkhoñ meñ ḳhuuñ utar aayā
qaidiyoñ par sitam hue haiñ bahut
us ke vāris nazar nahīñ aa.e
shāyad us laash ke pate haiñ bahut
jāgte haiñ to paañv meñ zanjīr
varna ham niind meñ chale haiñ bahut
jin ke saa.e meñ raat guzrī hai
un sitāroñ ne dukh diye haiñ bahut
tujh se milne kā rāsta bas ek
aur bichhaḌne ke rāste haiñ bahut