vo saḳhī hai to kisī roz bulā kar le jaa.e

aur mujhe vasl ke ādāb sikhā kar le jaa.e

mere andar kisī afsos kī tārīkī hai

is andhere meñ koī aag jalā kar le jaa.e

ye mirī ruuh meñ naddī kī thakan kaisī hai

vo samundar kī tarah aa.e bahā kar le jaa.e

hijr meñ jism ke asrār kahāñ khulte haiñ

ab vahī sehr kare pyaar se aa kar le jaa.e

ḳhaak āñkhoñ meñ hai vo ḳhvāb kahāñ miltā hai

jo mujhe qaid-e-manāzir se rihā kar le jaa.e