mirā akelā ḳhudā yaad aa rahā hai mujhe
ye sochtā huā girjā bulā rahā hai mujhe
mujhe ḳhabar hai ki ik musht-e-ḳhāk huuñ phir bhī
tū kyā samajh ke havā meñ uḌā rahā hai mujhe
ye kyā tilism hai kyuuñ raat bhar sisaktā huuñ
vo kaun hai jo diyoñ meñ jalā rahā hai mujhe
usī kā dhyān hai aur pyaas baḌhtī jaatī hai
vo ik sarāb ki sahrā banā rahā hai mujhe
maiñ āñsuoñ meñ nahāyā huā khaḌā huuñ abhī
janam janam kā añdherā bulā rahā hai mujhe