nigāhoñ par nigahbānī bahut hai
navāzish zill-e-sub.hānī bahut hai
yahāñ aise hī ham kab baiTh jaate
tire kūche meñ vīrānī bahut hai
abhī qasd-e-safar kā qissa kaisā
abhī rāhoñ meñ āsānī bahut hai
tirī āñkheñ ḳhudā mahfūz rakkhe
tirī āñkhoñ meñ hairānī bahut hai
lab-e-dariyā zabāñ se tar kareñge
abhī talvār meñ paanī bahut hai
mubārak un ko sultānī adab kī
mujhe to us kī darbānī bahut hai