chaal ham sab se chal gayā sūraj
kitnā aage nikal gayā sūraj
jalte jalte pighal bhī saktā hai
jab sunā to dahal gayā sūraj
roz kī tarah kal bhī ā.ūñgā
aaj bhī sab ko chhal gayā sūraj
sar chhapāne ko jab jagah na milī
kitne chehroñ meñ Dhal gayā sūraj
ek badlī jo paas se guzrī
rañg kitne badal gayā sūraj
tah karo ḳhvāb shab sameTo ab
phir safar par nikal gayā sūraj
Dar gayā shahar ke makānoñ se
vaqt se pahle Dhal gayā sūraj