zindagī ke kaTahre meñ ik be-ḳhatā aadmī kī tarah
ham muḳhātib hue aap se be-navā aadmī kī tarah
dūriyoñ se ubhartā huā aks tasvīr bantā gayā
guftugū raat kartī thī ham se havā aadmī kī tarah
kaun kyā sochtā hai hamāre ravayyoñ pe sochā nahīñ
umr ham ne guzārī hai ik mubtalā aadmī kī tarah
rauzanoñ tak se koī makīñ jhāñktā ye bhī mumkin na thā
dastakeñ detī phirtī thī bād-e-sabā aadmī kī tarah