qadam uThe to ajab dil-gudāz manzar thā
maiñ āp-apne liye rāste kā patthar thā
dil ek aur hazār āzmā.isheñ ġham kī
diyā jalā to thā lekin havā kī zad par thā
har ā.īna mirī āñkhoñ se pūchh letā hai
vo aks kyā hue ābād jin se ye ghar thā
har ik azaab ko maiñ sah gayā magar na milā
vo ek ġham jo mire hausle se baḌh kar thā
ye vahm thā ki mujhe vo bhulā chukā hogā
magar milā to vo merī hī tarah muztar thā
hazār baar ḳhud apne makāñ pe dastak dī
ik ehtimāl meñ jaise ki maiñ hī andar thā
tamām umr kī tanhā.iyāñ sameTī haiñ
yahī mire dar-o-dīvār kā muqaddar thā
udaas rastoñ meñ paiham sulagtī sub.hoñ meñ
jo ġham-gusār thā koī to dīda-e-tar thā