ham tire ġham ko jo purkār banā kar uTThe
nafas-e-garm ko talvār banā kar uTThe
aao ham hañste uTheñ bazm-e-dil-āzārāñ se
kaun ehsās ko bīmār banā kar uTThe
raat bhar tajraba-e-ḳhūn-e-jigar ham ne kiyā
sub.h-dam dasht ko gulzār banā kar uTThe
mahfil-e-rāz meñ ham sah ga.e har vahm kī choT
āḳhir ik ishq kā me.aar banā kar uTThe
un nigāhoñ kā taqāzā-e-suḳhan yuuñ thā ki ham
be-zabānī ko bhī ash.ār banā kar uTThe
jab pa.e-fikr-e-suḳhan ham kabhī baiThe 'kausar'
sher ko misr kā bāzār banā kar uTThe