kuchh is tarah se terā ġham diye jalātā thā

ki ḳhāk-e-dil kā har ik zarra jagmagātā thā

isī liye na kiyā talḳhī-e-jahāñ kā galā

tirā ḳhayāl pas-e-parda muskurātā thā

na yaad rakhtā thā mujh ko na bhuul jaatā thā

kabhī kabhī vo mujhe yuuñ bhī āzmātā thā

har aa.ina thā sarāpā hijāb mere liye

maiñ apne aap ko dekhūñ nazar vo aatā thā

nazar churā ke vo guzrā qarīb se lekin

nazar bachā ke mujhe dekhtā bhī jaatā thā

ġhazal ke lahje meñ hotī thī guftugū us se

vazāhatoñ meñ bhī ib.hām rah hī jaatā thā

vahāñ bhī sāya-e-dīvār us kā yaad rahā

ḳhud apnā saaya jahāñ saath chhoḌ jaatā thā

udaas kamra mahaktā thā kis kī yādoñ se

vo kaun shaḳhs thā kyā thā kahāñ se aatā thā

chamakte the dar-o-dīvār ā.inoñ kī tarah

in ā.inoñ meñ koī aks muskurātā thā

ye ḳhvāb hī mirī tanhā.iyoñ kā hāsil thā

ye ḳhvāb hī mirī tanhā.iyāñ baḌhātā thā