badan se ruuh ruḳhsat ho rahī hai
mukammal qaid ġhurbat ho rahī hai
maiñ ḳhud tark-e-ta.alluq par huuñ majbūr
kuchh aisī hī tabī.at ho rahī hai
jafā un kī dil-e-zūd-āshnā par
ba-miqdār-e-mohabbat ho rahī hai
ḳhudā se mil gayā hai husn-e-kāfir
ḳhudā.ī par hukūmat ho rahī hai
nahīñ tanhā.ī-e-zindāñ mukammal
mujhe saaye se vahshat ho rahī hai
ye tum hañs hañs ke bāteñ kar rahe ho
ki taqsīm-e-jarāhat ho rahī hai
agar mashrab nahīñ badlā hai 'sīmāb'
to kyuuñ tajdīd-e-bai.at ho rahī hai