baḌī dilchaspiyoñ se sub.h-e-shām-e-zindagī hogī
maiñ dekhūñgā unheñ aur saarī duniyā dekhtī hogī
kuchh aise dard se furqat meñ maiñ ne haath uThā.e haiñ
duā bhī kāmyābī kī duā.eñ māñgtī hogī
sar-e-mahshar hijāb o shauq kā ik ma.arka hogā
unheñ apnī paḌī hogī mujhe apnī paḌī hogī
na karte hashr ko rusvā kabhī din ke ujāle meñ
ḳhabar kyā thī tirī furqat kī raat itnī baḌī hogī
ta.ajjub kyā lage gar aag ai 'sīmāb' siine meñ
hazāroñ dil meñ añgāre bhare the lag ga.ī hogī