jo umr terī talab meñ gañvā.e jaate haiñ
kuchh aise log bhī duniyā meñ paa.e jaate haiñ
lagāv hai mirī tanhā.iyoñ se fitrat ko
tamām raat sitāre lagā.e jaate haiñ
samā.ī jaatī haiñ dil meñ vo kufr-bār āñkheñ
ye but-kade mire ka.abe pe chhā.e jaate haiñ
samajh haqīr na in zindagī ke lamhoñ ko
are inhīñ se zamāne banā.e jaate haiñ
haiñ dil ke daaġh bhī kyā dil ke daaġh ai 'sīmāb'
Tapak rahe haiñ magar muskurā.e jaate haiñ