husn ke dil meñ jagah paate hī dīvāna bane
ham abhī raaz bane hī the ki afsāna bane
kah diyā hai ki milo ham se to yaksū ho kar
ab nibhe yā na nibhe un se bane yā na bane
aaj vo bazm meñ ḳhud sham.a bane baiThe haiñ
hai koī mudda.ī-e-soz jo parvāna bane
dil-e-āzurda hai labrez-e-hadīs-e-ġham-e-ishq
maiñ agar chāhūñ to har saañs ik afsāna bane
kitne dīvāne mohabbat meñ miTe haiñ 'sīmāb'
jamā kī jaa.e jo ḳhaak un kī to vīrāna bane