ruknā paḌegā aur bhī chalne ke naam par
girtī rahegī ḳhalq sambhalne ke naam par
phañstā gayā huuñ aur nikalne kī sa.ī meñ
aafat mazīd aa.ī hai Talne ke naam par
ye kyā tilism hai ki ubharne ke shauq meñ
āvāz dab ga.ī hai nikalne ke naam par
dil kā shajar to aur bhī palne kī aaḌ meñ
murjhā gayā hai phūlne-phalne ke naam par
vo jā chukā hai aur badan ke navāh meñ
ab jam rahī hai barf pighalne ke naam par
badlegā koī roz na.e-pan ke shauq meñ
yaksāñ rahegā koī badalne ke naam par
ma.anī kā sabza-gāh nazar aa gayā to phir
bhaḌkegā lafz sher meñ Dhalne ke naam par