jahāñ pe hotā huuñ aksar vahāñ nahīñ hotā
vahīñ talāsh karo maiñ jahāñ nahīñ hotā
agar tumhārī zabāñ se bayāñ nahīñ hotā
mirā vajūd kabhī dāstāñ nahīñ hotā
bichhaḌ gayā thā vo milne se pesh-tar varna
maiñ is tarah se kabhī rā.egāñ nahīñ hotā
nazar bachā ke nikalnā to chāhtā huuñ magar
vo kis jagah se hai ġhā.eb kahāñ nahīñ hotā
kabhī to yuuñ ki makāñ ke makīñ nahīñ hote
kabhī kabhī to makīñ kā makāñ nahīñ hotā