yaad paḌtā to nahīñ kab mirā dekhā huā hai
aisā lagtā hai ki ye sab mirā dekhā huā hai
aur us but kī parastish meñ nayā kuchh bhī nahīñ
aur kyuuñ dekhūñ use jab mirā dekhā huā hai
maut kuchh mere liye laa.e to laa.e shāyad
zindagī kā to sabhī Dhab mirā dekhā huā hai
is dafa ishq ke jañgal se nikal ā.ūñgā
raah kā saarā fusūñ ab mirā dekhā huā hai
kis tarah husn ko lafzoñ meñ muqaffal kar duuñ
kis tarah kah duuñ mirā rab mirā dekhā huā hai