ek to kāvish-e-jigar bhī karūñ
aur phir minnat-e-samar bhī karūñ
ishq meñ ḳhair thā junūñ lāzim
ab koī dūsrā hunar bhī karūñ
sochtā huuñ tire ta.āqub meñ
ḳhud ko rusvā-e-bāl-o-par bhī karūñ
pahle bin-māñge zindagī de dī
aur phir shart hai basar bhī karūñ
sher likkhūñ bhī aur logoñ meñ
shā.erī apnī mushtahar bhī karūñ
lafz o ma.anī kā jabr jhelūñ bhī
aur phir ḳhud ko mo'tabar bhī karūñ
kaam kuchh be-sabab bhī kar Dālūñ
aur kuchh kaam soch kar bhī karūñ