yuuñ tire husn kī tasvīr ġhazal meñ aa.e
jaise bilqīs sulemāñ ke mahal meñ aa.e
jabr se ek huā zā.eqa-e-hijr-o-visāl
ab kahāñ se vo mazā sabr ke phal meñ aa.e
ye bhī ārā.ish-e-hastī kā taqāzā thā ki ham
halqa-e-fikr se maidān-e-amal meñ aa.e
har qadam dast-o-garebāñ hai yahāñ ḳhair se shar
ham bhī kis mārka-e-jañg-o-jadal meñ aa.e
zindagī jin ke tasavvur se jilā paatī thī
haa.e kyā log the jo dām-e-ajal meñ aa.e