sar meñ jab ishq kā saudā na rahā

kyā kaheñ ziist meñ kyā kyā na rahā

ab to duniyā bhī vo duniyā na rahī

ab tirā dhyān bhī utnā na rahā

qissa-e-shauq sunā.ūñ kis ko

rāzdārī kā zamānā na rahā

zindagī jis kī tamannā meñ kaTī

vo mire haal se begāna rahā

Dere Daale haiñ ḳhizāñ ne chau-des

gul to gul baaġh meñ kāñTā na rahā

din dahāḌe ye lahū kī holī

ḳhalq ko ḳhauf ḳhudā kā na rahā

ab to so jaao sitam ke maaro

āsmāñ par koī taarā na rahā