nāz-e-begānagī meñ kyā kuchh thā
husn kī sādgī meñ kyā kuchh thā
laakh rāheñ thiiñ laakh jalve the
ahd-e-āvārgī meñ kyā kuchh thā
aañkh khulte hī chhup ga.ī har shai
ālam-e-be-ḳhudī meñ kyā kuchh thā
yaad haiñ marhale mohabbat ke
haa.e is bekalī meñ kyā kuchh thā
kitne biite dinoñ kī yaad aa.ī
aaj terī kamī meñ kyā kuchh thā
kitne mānūs log yaad aa.e
sub.h kī chāñdnī meñ kyā kuchh thā
rāt-bhar ham na so sake 'nāsir'
parda-e-ḳhāmushī meñ kyā kuchh thā