tirī nigāh ke jaadū bikharte jaate haiñ
jo zaḳhm dil ko mile the vo bharte jaate haiñ
tire baġhair vo din bhī guzar ga.e āḳhir
tire baġhair ye din bhī guzarte jaate haiñ
liye chalo mujhe dariyā-e-shauq kī maujo
ki ham-safar to mire paar utarte jaate haiñ
tamām-umr jahāñ hañste khelte guzrī
ab us galī meñ bhī ham Darte Darte jaate haiñ
maiñ ḳhvāhishoñ ke gharauñde banā.e jaatā huuñ
vo mehnateñ mirī barbād karte jaate haiñ