gard ne ḳhema taan liyā thā
dhuup kā shīsha dhuñdlā sā thā
nikhat-o-nūr ko ruḳhsat karne
bādal duur talak aayā thā
ga.e dinoñ kī ḳhushbū pā kar
maiñ dobāra jī uTThā thā
sotī jāgtī guḌiyā ban kar
terā aks mujhe taktā thā
vaqt kā ThāTheñ mārtā sāgar
ek hī pal meñ simaT gayā thā
jañgal dariyā khet ke TukḌe
yaad nahīñ ab aage kyā thā
niil gagan se ek parinda
piilī dhartī par utrā thā