kyuuñ ġham-e-raftagāñ kare koī

fikr-e-vāmāñdgāñ kare koī

tere āvārgān-e-ġhurbat ko

shāmil kārvāñ kare koī

zindagī ke azaab kyā kam haiñ

kyuuñ ġham-e-lā-makāñ kare koī

dil Tapakne lagā hai āñkhoñ se

ab kise rāzdāñ kare koī

us chaman meñ ba-rañg-e-nik.hat-e-gul

umr kyuuñ rā.egāñ kare koī

shahr meñ shor ghar meñ tanhā.ī

dil kī bāteñ kahāñ kare koī

ye ḳharābe zarūr chamkeñge

e'tibār-e-ḳhizāñ kare koī